Aktgjykim sot për Millorad Gjokoviqin, i akuzuar për vrasjet e civilëve në Ozdrim

Gjashtë civilë shqiptarë të vrarë nga breshëritë e armëve, tre të plagosur që, sipas aktakuzës, u dërguan fillimisht në spitalin e Pejës e më pas u ekzekutuan, dhe pesë të tjerë trupat e të cilëve nuk u gjetën kurrë. Për këto ngjarje në fshatin Ozdrim të Komunës së Pejës, sot në orën 13:30, në Pallatin e Drejtësisë në Prishtinë, pritet të shpallet aktgjykimi ndaj Millorad Gjokoviqit, i akuzuar për krime lufte.

Aktakuza, e përpiluar më 23 qershor 2023, e vendos Gjokoviqin në vitet 1998-1999 në Ozdrim dhe në fshatrat përreth regjionit të Pejës, si pjesëtar të forcave policore dhe ushtarake serbe. Sipas prokurorisë, ai ka aplikuar ndaj dhjetëra civilëve shqiptarë masat e vrasjes, bastisjes, rrahjes, maltretimit, arrestimit dhe torturës, trajtimin mizor dhe çnjerëzor, mbajtjen në kushte skllavërie, si dhe dëbimin e deportimin e tyre. Atij i ngarkohen gjithashtu plaçkitja, djegia dhe shkatërrimi i shtëpive të popullsisë civile shqiptare.

Aktakuza përshkruan edhe mënyrën se si u sulmua fshati. Ushtria e rregullt kishte hyrë nga ana veriore e Ozdrimit, përmes rrugës regjionale Pejë-Mitrovicë, ndërsa nga ana perëndimore, aty ku fshati kufizohet me Vitormiricën, kishin hyrë grupet paramilitare, të përziera me pjesëtarë të njësiteve speciale ushtarake. Sipas aktakuzës, këto forca nisën të shtinin me armë drejt popullsisë civile.

Nga të shtënat humbën jetën gjashtë civilë. Tre të tjerë, të plagosur në të njëjtin sulm, u transportuan për në spitalin e Pejës, por më pas, sipas akuzës, u ekzekutuan dhe u varrosën në fshatin Lutogllavë. Pesë civilë të tjerë shqiptarë u vranë gjatë ofensivës, por trupat e tyre nuk u gjetën asnjëherë dhe ata ende figurojnë në listën e të zhdukurve.

Gjokoviq ngarkohet se, në bashkëkryerje, ka kryer veprën penale "Krim i luftës kundër popullsisë civile", të sanksionuar me nenin 142 lidhur me nenin 22 të Ligjit Penal të ish-Republikës Socialiste Federative të Jugosllavisë, ligjit që ishte në fuqi në kohën kur pretendohet se janë kryer veprat.

Deri në momentin e publikimit, vendimi i gjykatës nuk ishte shpallur ende. Akuzat mbeten pretendime të prokurorisë derisa gjykata të shprehet përfundimisht për fajësinë ose pafajësinë e të akuzuarit.