Aksident me një veturë në Jabllanicë të Vogël: dy të lënduar, njëri dërgohet në QKUK

Dy persona kanë mbetur të lënduar sot, rreth orës 17:20, në një aksident trafiku në fshatin Jabllanicë e Vogël të Pejës, ku sipas Policisë është përfshirë vetëm një veturë.

Zëdhënësi i Policisë për rajonin e Pejës bëri të ditur se të dy të lënduarit u dërguan fillimisht në Spitalin Rajonal të Pejës për trajtim mjekësor. Për shkak të gjendjes shëndetësore, njëri prej tyre është transferuar më pas në Qendrën Klinike Universitare të Kosovës (QKUK) në Prishtinë, ku do të marrë trajtim të mëtejshëm. Nuk është bërë e ditur se në çfarë gjendje ndodhen aktualisht të lënduarit.

Rrethanat në të cilat ndodhi aksidenti mbeten nën hetim. Njësiti Rajonal i Trafikut ka nisur veprimet e nevojshme për të sqaruar se si ndodhi përplasja.