AKK kundërshton Muratin: Rritja e buxhetit komunal është vetëm në letër, jo në xhepin e komunave

Rritja e buxhetit të komunave për vitin 2027, e paraqitur si një hap përpara, është vetëm nominale. Ky është vlerësimi i drejtorit ekzekutiv të Asociacionit të Komunave të Kosovës (AKK), Sazan Ibrahimi, i cili ka kritikuar mënyrën se si ministri në detyrë i Financave, Hekuran Murati, e ka prezantuar shtesën për pushtetin vendor.

Sipas Ibrahimit, shifra prej 40.3 milionë eurosh nuk përkthehet domosdoshmërisht në po aq financim shtesë për komunat. "Nuk mund të flitet për rritje substanciale të buxhetit komunal duke përmendur vetëm diferencën nominale prej 40.3 milionë eurosh", ka deklaruar ai.

Në letra, buxheti i komunave pritet të rritet nga 867.65 milionë euro në vitin 2026 në 907.94 milionë euro në vitin 2027 — një diferencë prej 40.29 milionë eurosh. Por, sipas AKK-së, financimi neto shtesë që vjen realisht nga niveli qendror është rreth 31 milionë euro. "Financimi neto shtesë nga niveli qendror është rreth 31 milionë euro. Vetëm hendeku i mundshëm në arsim arrin në 32.8 milionë euro", ka thënë Ibrahimi.

Në qendër të shqetësimit qëndron shkurtimi i granteve specifike. Granti për Arsim për vitin 2027 është planifikuar në 261.47 milionë euro, nga 270.27 milionë euro sa ishte një vit më parë — pra 8.8 milionë euro më pak. Paralelisht, Granti për Shëndetësi shkurtohet për rreth 1.91 milionë euro.

Sipas vlerësimeve të AKK-së, mungesa ekzistuese e financimit në arsim është rreth 24 milionë euro. Nëse kësaj i shtohet shkurtimi prej 8.8 milionë eurosh, hendeku i mundshëm financiar në arsim mund të arrijë deri në rreth 32.8 milionë euro.

Ibrahimi ka ngritur alarmin edhe për inflacionin. "Nëse norma aktuale e inflacionit prej 6.5% vazhdon edhe gjatë vitit 2027, komunat mund të pësojnë rënie reale të fuqisë blerëse prej rreth 15.1 milionë eurosh", ka deklaruar ai. Sipas dokumentit të AKK-së, rritja nominale e buxhetit komunal është 4.64 për qind, ndërsa inflacioni vjetor i regjistruar në korrik 2026 është 6.5 për qind — një raport që, nëse vazhdon, do ta zhbënte në praktikë rritjen e shpallur.

"Rritja e paraqitur është nominale. Nëse inflacioni dhe obligimet e pambuluara vazhdojnë në nivelet e analizuara, komunat rrezikojnë të kenë më pak fuqi reale financiare për investime dhe shërbime për qytetarët", ka theksuar Ibrahimi.

Asociacioni i ka kërkuar Ministrisë së Financave sqarime konkrete: për shkurtimet në arsim e shëndetësi, për mënyrën se si do të mbulohet mungesa e financimit dhe për shumën që realisht do t'u mbetet komunave për investime dhe përmirësim të shërbimeve publike.

"Komunat nuk kanë nevojë për shifra nominale. Ato kanë nevojë për financim të mjaftueshëm, të drejtë dhe të qëndrueshëm për ushtrimin e kompetencave që ua garanton ligji", përfundon reagimi i AKK-së.