AKB pas aktgjykimit në Hagë: Kosova rrezikon kosto ekonomike dhe besimin e investitorëve

Reagimi i sektorit privat erdhi pak pasi në Hagë u shpall aktgjykimi ndaj ish-krerëve të UÇK-së. Aleanca Kosovare e Bizneseve (AKB), organizatë që përfaqëson sektorin privat, tërheq vëmendjen se vendimi i Dhomave të Specializuara të Kosovës mund të ndikojë në imazhin ndërkombëtar të vendit dhe në klimën investuese.

AKB deklaron se respekton pavarësinë e drejtësisë dhe të drejtën e palëve për t'i përdorur të gjitha mjetet juridike, përfshirë procedurat e apelit. "Vendimi i sotëm është vendim i shkallës së parë dhe procesi juridik vazhdon në përputhje me procedurat e përcaktuara", thuhet në reagimin e organizatës.

Megjithatë, shqetësimi kryesor i AKB-së është ekonomik. Sipas organizatës, investitorët nuk shikojnë vetëm tregun dhe kostot, por vlerësojnë edhe stabilitetin politik, sundimin e ligjit, sigurinë juridike dhe perceptimin ndërkombëtar të një vendi. "Sot, Kosova ka nevojë më shumë se kurrë për investime të huaja, kapital, teknologji, vende të reja pune, eksporte dhe integrim në tregun evropian", theksohet në reagim.

AKB paralajmëron se çdo zhvillim që mund të krijojë perceptim të pasigurisë politike apo juridike duhet të trajtohet me përgjegjësi nga institucionet e Kosovës. "AKB është e shqetësuar që Kosova të mos perceptohet ndërkombëtarisht vetëm përmes një kapitulli të dhimbshëm të së kaluarës, por të vlerësohet edhe për potencialin ekonomik, rininë, diasporën, ndërmarrësinë dhe mundësitë për investime", shtohet më tej.

Organizata i kërkon institucioneve të Republikës së Kosovës të forcojnë stabilitetin institucional dhe politik, të rrisin besimin e investitorëve vendorë dhe të huaj, të zhvillojnë diplomaci më aktive ekonomike dhe të komunikojnë qartë me partnerët ndërkombëtarë për potencialin ekonomik të vendit. Kërkon, njëkohësisht, garantimin e sigurisë juridike dhe të sundimit të ligjit, si dhe që zhvillimet politike e juridike të mos dëmtojnë ekonominë dhe bizneset e vendit.

"Kosova nuk guxon të shihet si një vend pa perspektivë. Kosova është një vend me ekonomi të re, me mijëra ndërmarrje, me një gjeneratë të re të ndërmarrësve, me diasporë të fuqishme dhe me potencial të madh për investime", thuhet në reagim.

Thirrja e AKB-së është për unitet ekonomik dhe institucional, me argumentin se përplasjet politike nuk duhet të thellohen në dëm të ekonomisë. "Bizneset nuk kanë kufij partiakë. Investimet nuk kanë ngjyrë politike. Punësimi nuk ka parti. E ardhmja ekonomike e Kosovës është interes i përbashkët kombëtar", theksohet në dokument.

Kryetari i AKB-së, Agim Shahini, ka thënë se vendi ka nevojë njëkohësisht për drejtësi, institucione funksionale dhe zhvillim ekonomik. "Kosova ka nevojë për drejtësi, por Kosova ka nevojë edhe për ekonomi. Kosova ka nevojë për institucione, por edhe për investime. Kosova ka nevojë për kujtesë historike, por mbi të gjitha duhet të ndërtojë të ardhmen", u shpreh Shahini.