Aheng familjar në Lukinje të Prizrenit, 11 gëzhoja në tokë dhe një i ndaluar

Njëmbëdhjetë gëzhoja të shpërndara në tokë, një armë e sekuestruar dhe një i dyshuar i shoqëruar në stacion policor. Ky ishte epilogu i një ahengu familjar në fshatin Lukinje të Prizrenit, mbrëmjen e 19 shtatorit.

Rasti u raportua rreth orës 21:10, pasi ishte pranuar informata se gjatë festës po shtihej me armë zjarri. Patrulla policore doli menjëherë në vendngjarje, ku hasi një 21-vjeçar, i dyshuar se kishte shtënë me armë. Në afërsi të tij u gjetën 11 gëzhoja.

Në lokacion punuan edhe ekipi i forenzikës dhe hetuesi kujdestar. Përveç gëzhojave, u sekuestrua edhe një armë zjarri, ndërsa i dyshuari u shoqërua në stacion policor.

Për rastin u njoftua Prokurori i Shtetit. Me urdhër të tij, ndaj 21-vjeçarit u caktua masa e ndalimit prej 48 orësh. Rasti është iniciuar për veprat penale "Mbajtje në pronësi, kontroll ose posedim të paautorizuar të armëve" dhe "Shkaktim i rrezikut të përgjithshëm".

I dyshuari prezumohet i pafajshëm derisa fajësia të mos provohet me vendim të formës së prerë të gjykatës.