Agjenti i ICE-s që qëlloi një burrë, në qendër të një beteje ligjore mes Minesotës dhe Teksasit

Një agjent federal i imigracionit i akuzuar se qëlloi e plagosi një burrë gjatë fushatës së ashpër të imigracionit të presidentit Donald Trump në Mineapolis është kthyer në epiqendër të një përplasjeje ligjore mes dy shteteve amerikane. Prokurori i Përgjithshëm i shtetit të Minesotës, Keith Ellison, ka paditur guvernatorin e Teksasit, Greg Abbott, për ta detyruar të lejojë ekstradimin e agjentit, në mënyrë që ai të dalë para gjyqit.

Në padinë e depozituar të martën, Ellison argumentoi se Abbott ka refuzuar të përmbushë detyrimin e tij "të detyrueshëm" për të transferuar agjentin e Zyrës së Imigracionit dhe Doganave (ICE), Christian Castro, 52-vjeç. "Guvernatori Abbott e ka mbajtur urdhrin dhe e ka penguar ekstradimin e Castros për gati tre muaj," u tha Ellison gazetarëve. "Ai nuk ka asnjë tagër për të refuzuar ta bëjë këtë."

Prokurori i Minesotës i kërkoi gjithashtu gjykatës së rrethit të SHBA-së në Teksasin jugor të ndalojë sheriffin e qarkut Cameron, Manuel Trevino, që të lejojë lirimin e Castros nga burgu.

Në qendër të çështjes qëndron një ngjarje e 14 janarit. Sipas autoriteteve, Castro shtëni me armë drejt derës së përparme të shtëpisë së Julio Cesar Sosa-Celis, një burrë me origjinë venezuelane që jetonte në Minesotë, duke e goditur atë në këmbë.

Në fillim, administrata Trump pretendoi se agjentët kishin qëlluar në vetëmbrojtje, duke akuzuar Sosa-Celisin dhe dy persona të tjerë se kishin sulmuar oficerët me një fshesë dhe me një lopatë bore gjatë një operacioni për zbatimin e ligjit të imigracionit. Sekretarja e atëhershme e Sigurisë Kombëtare, Kristi Noem, e cilësoi incidentin si një "tentativë vrasjeje" të një agjenti të ICE-s.

Por doli një video që binte ndesh me dëshminë e agjentëve. Në shkurt, prokurorët federalë hoqën akuzat që kishin ngritur kundër Sosa-Celisit dhe bashkëbanuesit të tij, Alfredo Aljorna. Po atë muaj, drejtori i atëhershëm në detyrë i ICE-s, Todd Lyons, konfirmoi se Castro dhe një agjent i dytë dukej se kishin gënjyer për ngjarjen; të dy oficerët u pezulluan më pas nga detyra.

"Një shqyrtim i përbashkët nga ICE-ja dhe Departamenti i Drejtësisë (DOJ) i provave video ka zbuluar se dëshmia nën betim e dhënë nga dy oficerë të veçantë duket se ka përmbajtur pohime të pavërteta," tha Lyons në një deklaratë.

Në maj, Zyra e Prokurorit të Qarkut Hennepin e akuzoi Castron me katër akuza për sulm të shkallës së dytë dhe një akuzë për raportim të rremë të një krimi. "Zoti Castro është agjent i ICE-s. Por distinktivi i tij federal nuk e bën atë imun ndaj akuzave shtetërore për sjelljen e tij kriminale në Minesotë," deklaroi prokurorja e qarkut Hennepin, Mary Moriarty.

Castro u arrestua më 29 maj në Teksas dhe ka mbetur në paraburgim që atëherë. Ellison ka shprehur shqetësimin se autoritetet e Teksasit — përfshirë Abbottin, një aleat i presidentit Trump — mund të kërkojnë lirimin e tij në vend që ta lënë të përballet me gjyqin. Prokurori i Minesotës e përshkroi Castron si rrezik ikjeje, të prirur të arratiset përtej kufirit të SHBA-së drejt Meksikës.