Aflatoksinë mbi kufirin e lejuar: AUV kthen në Serbi 27 tonë misër merkantil

Tridhjetë e tre mikrogramë për kilogram, kur kufiri i lejuar është njëzet. Ky ishte niveli i aflatoksinës i gjetur në një ngarkesë prej 27 tonësh misër merkantil me origjinë nga Serbia, e cila nuk do të arrijë në tregun e Kosovës.

Agjencia e Ushqimit dhe Veterinarisë (AUV) ka refuzuar importin dhe ka urdhëruar që e gjithë sasia, 27 mijë kilogramë, të kthehet në vendin e origjinës. Sipas AUV-së, prania e aflatoksinës mbi limitet u konstatua gjatë kontrolleve të shtuara për sigurinë ushqimore, dhe vendimi për refuzimin e ngarkesës u nxor menjëherë.

Rezultati nuk u mbështet vetëm në analizën e parë. Ai u konfirmua edhe përmes një superanalize të kryer nga laboratori referent në Austri, dhe vetëm mbi bazën e këtyre rezultateve AUV urdhëroi kthimin e misrit. Ngarkesa ishte importuar nga një operator ekonomik, të cilin agjencia e ka identifikuar në njoftimin e saj.

Ministria e Bujqësisë, Pylltarisë dhe Zhvillimit Rural thotë se mbetet e përkushtuar ndaj kontrolleve rigoroze të importeve, mbrojtjes së shëndetit të qytetarëve dhe parandalimit të hyrjes në tregun e Kosovës të produkteve që nuk i plotësojnë standardet e sigurisë ushqimore.

Sipas ministrisë, kontrollet e intensifikuara do të vazhdojnë, me tolerancë zero ndaj çdo produkti që i tejkalon kufijtë e lejuar të substancave të dëmshme.