Afati i 6 tetorit afron pa marrëveshje për presidentin, Koci paralajmëron kaos kushtetues

Mesnata e së martës, 6 tetor, është kufiri që Gjykata Kushtetuese i ka vënë Kosovës për të zgjedhur presidentin apo presidenten e Republikës. Ora po ecën, ndërsa mes partive politike ende nuk shihet asnjë shenjë marrëveshjeje.

Njohësi i çështjeve politike Melazim Koci nuk sheh rrugëdalje në horizont. "Gjykata Kushtetuese ka përcaktuar 6 tetorin si ditën e fundit për zgjedhjen e presidentit/presidentes së Republikës së Kosovës. Deri në këto çaste nuk ka asnjë tregues që flet për tejkalimin e kësaj krize", tha ai.

Në qendër të bllokimit është edhe Ligji për Dhomat e Specializuara. PDK-ja e ka futur në bisedimet për presidentin kërkesën që ky ligj të ndryshohet dhe kërkon që projektligji përkatës të miratohet në Kuvendin e Kosovës në të dy leximet, pikërisht deri më 6 tetor. Koci është skeptik se dy çështjet mund të zgjidhen në kohë: "Gjasat për marrëveshje rreth Ligjit për Specialen dhe Presidentin/Presidenten janë minimale. Madje mund të thuhet se nuk ka as vullnet politik që Kosova të bëhet me president/presidente".

Lëvizje ka pasur gjatë fundjavës. Të shtunën, kryetari i Vetëvendosjes, Albin Kurti, u takua veçmas me kryetarin e PDK-së, Bedri Hamza, dhe me kryetarin e LDK-së, Lumir Abdixhiku, në përpjekje për të gjetur një zgjidhje për zgjedhjen e kreut të shtetit. Nuk dihet ende nëse takimet prodhuan ndonjë afrim qëndrimesh.

Nëse afati kalon pa president, pasoja e parë, sipas Kocit, është e qartë: "Pas 6 tetorit, Kuvendi shpërndahet automatikisht dhe zgjedhjet duhet të mbahen brenda 45 ditëve".

Pyetjet e vërteta, thotë ai, nisin pikërisht aty. "Ky afat ose mesnata e së martës hap një dilemë të re: kush do të merret me teknikalitetet, konsultimet me partitë politike dhe shpalljen e datës së zgjedhjeve?", tha Koci. Sipas tij, kjo nuk është e rregulluar qartë me Kushtetutë, prandaj nuk përjashtohet që presidentja në detyrë, Albulena Haxhiu, të kërkojë sqarim nga Gjykata Kushtetuese. "Kjo çështje nuk është e rregulluar me Kushtetutë dhe nuk do të më befasonte nëse znj. Haxhiu i drejtohet Gjykatës Kushtetuese", deklaroi ai.

Për Kocin, cilido skenar të ndodhë, rezultati është i njëjtë: "Në të gjitha variantet, Kosova nga 6 tetori do të hyjë në situatë të panjohur dhe të paprecedentë kushtetuese".

Ai u bëri thirrje institucioneve dhe partive që t'i respektojnë afatet kushtetuese, me një paralajmërim të prerë: "'Loja' me afate ose, edhe më keq, injorimi i tyre mund ta shpie Kosovën drejt kaosit kushtetues".