Afati i 27 nëntorit afron: PDK synon ndryshim ligji, juristët shohin pak kohë

Data 27 nëntor po afrohet dhe me të edhe momenti kur mbrojtja e Hashim Thaçit, Kadri Veselit, Jakup Krasniqit dhe Rexhep Selimit duhet të dorëzojë njoftimet për apelimin e aktgjykimit të Dhomave të Specializuara. Ndërkohë, në Kuvendin e Kosovës, Partia Demokratike e Kosovës (PDK) po përpiqet të ndryshojë ligjin mbi të cilin funksionon vetë gjykata.

Afati u caktua nga Trupi Gjykues i Apelit dhe nuk ishte ai fillestari: ai u shty pasi mbrojtja e katër ish-krerëve të UÇK-së e kërkoi këtë. Si arsye u përmendën kompleksiteti i çështjes dhe koha që nevojitet për përkthimin e aktgjykimit në gjuhën shqipe.

PDK thotë se po ndërmerr çdo hap që mundet në mbështetje të tyre. Hapi kryesor është nisma për plotësim-ndryshimin e Ligjit për Dhomat e Specializuara, e cila tani pret mendimin e Ministrisë së Drejtësisë para se të procedohet më tej në Kuvend. Për ta shtyrë çështjen përpara, deputetët e PDK-së kanë paralajmëruar bojkotimin e të gjitha komisioneve parlamentare derisa ndryshimi i ligjit të futet në procedurë.

Juristët pajtohen se, nga aspekti juridik, një ndryshim i tillë është i mundur. Problemi, sipas tyre, është koha. Avokatja Fehmije Gashi Bytyqi nuk e fsheh mosbesimin:

"Absolutisht jam skeptike se kjo mund të realizohet, sepse ne mund t’i bëjmë qejf vetit, por duhet ta njohim legjislaturën se si funksionon. Tjetra është faktori kohë. Gjykata e Apelit mund ta bëjë të formës së prerë, mund ta rikthejë në rigjykim. Atëherë, në këtë rast, do të mund të fitojnë në kohë. Por nëse vendoset çka do që të jetë, është një kohë shumë e shkurtër që paraqet rrezik, prandaj duhet të përforcohet strategjia e mbrojtjes", tha ajo.

Politologu Mazllum Baraliu e sheh zgjidhjen më shumë në diplomaci sesa në ndryshime ligjore. Sipas tij, institucionet e Kosovës duhet ta ndjekin nga afër procesin në Dhomat e Specializuara dhe të angazhohen diplomatikisht.

"Këtë s’mund ta ndalë askush, sepse ajo është formalisht gjykatë e Kosovës, ndërsa në fakt është një surrogate e pashembullt në botë, po flas për Gjykatën Speciale. Duhet ta monitorojë vazhdimisht në mënyrë aktive edhe një trup tjetër, i përbërë nga Qeveria, Parlamenti dhe MPJ-ja, si një trup sui generis, i cili do të lobonte në vazhdimësi deri në një vendim të shkallës së dytë dhe deri atëherë t’ia shpjegonte botës se me këtë vendim nuk mund të cënohen dhe nuk do të cënohen themelet e shtetit të Kosovës", deklaroi Baraliu.

Gjykata Speciale, e pyetur nga RTK për nismën e PDK-së për ndryshimin e ligjit, nuk ka kthyer përgjigje.