Adoleshent 17-vjeçar palestinez vritet nga kolonët izraelitë në Bregun Perëndimor

Një adoleshent palestinez 17-vjeçar është vrarë sot në Bregun Perëndimor të okupuar, gjatë një përleshjeje me kolonë hebrenj që u shoqërua me hedhje gurësh. Sipas Ministrisë palestineze të Shëndetësisë, i mituri u vra dhe një burrë tjetër u plagos nga të shtënat e kolonëve në vendbanimin Sair, në veri të qytetit Hebron.

Ushtria izraelite ka dhënë një version tjetër të ngjarjes. Sipas saj, ushtarët u dërguan në Sair pasi palestinezët po hidhnin gurë mbi civilë izraelitë që ndodheshin në atë zonë pa leje. Gjithnjë sipas ushtrisë izraelite, disa hebrenj u plagosën dhe një pjesëtar i sigurisë hapi zjarr.

Në një ngjarje të dytë, Autoriteti Palestinez për Çështje Civile njoftoi Ministrinë e Shëndetësisë se një burrë 58-vjeçar u vra herët këtë mëngjes nga të shtënat e forcave izraelite në Xhenin. Një zyrtar ushtarak izraelit, që nuk deshi t'i publikohej emri, tha se ky palestinez u përpoq të godiste me thikë një ushtar izraelit. I njëjti zyrtar deklaroi se i vrari ishte babai i Raed Hazemit, i cili në prill të vitit 2022 kreu një sulm me armë zjarri në Tel Aviv.

Dhuna në Bregun Perëndimor është përshkallëzuar. Sipas të dhënave të zyrtarëve palestinezë, të paktën 87 palestinezë janë vrarë këtë vit në gati 1.500 sulme të kolonëve hebrenj dhe ushtarëve mbi fshatra e shtëpi palestineze në atë zonë.