Admirali i NATO-s në veri të Kosovës, sy për sy me patrullat e KFOR-it dhe Policisë

Patrullat e përbashkëta të KFOR-it dhe të Policisë së Kosovës në veri të vendit kanë pasur sot vëzhgues të rangut të lartë. Admirali George M. Wikoff, komandanti i Komandës së Forcave të Përbashkëta Aleate të NATO-s në Napoli (JFC Naples), ka ndjekur në terren punën e pjesëtarëve të dy strukturave.

Në këtë vizitë, Wikoff u shoqërua nga komandanti i KFOR-it, gjeneralmajor Roberto Vergori, dhe nga drejtori i Policisë së Kosovës, Gazmend Hoxha.

Pas vëzhgimit të patrullimeve, Wikoff dhe Vergori u ndalën në Zubin Potok, ku u takuan me kryetarin e komunës, Milosh Peroviq. Sipas njoftimit të KFOR-it, në qendër të bisedës ishte situata e sigurisë në këtë komunë, të cilën palët e diskutuan dhe e vlerësuan së bashku.

KFOR-i e mbylli njoftimin duke rikonfirmuar qasjen e tij në terren: "KFOR-i vazhdon të vlerësojë rregullisht situatën në terren, të angazhohet me të gjitha komunitetet dhe të ruajë gatishmërinë operacionale. Ai mbetet i përkushtuar për përmbushjen e misionit të tij me profesionalizëm dhe paanshmëri".