8,608 inspektime dhe mbi 290 ndalime punimesh: Kosova ngre këshillin për sigurinë në punë

Mbi 290 kantiere dhe vende pune të mbyllura përkohësisht, pas 8,608 inspektimeve në vetëm shtatë muaj. Me këto shifra ministri për Punë, Familje dhe Vlerat e Luftës Çlirimtare, Andin Hoti, hapi takimin e parë të Këshillit Nacional për Siguri dhe Shëndet në Punë (KNSSHP). Ky është një organ i ri, i cili pritet t'u japë institucioneve të Kosovës rekomandime për të frenuar aksidentet në punë.

Takimi, i organizuar nga ministria që drejton Hoti, u përqendrua te tri çështje: forcimi i masave për mbrojtjen e punëtorëve, parandalimi i aksidenteve dhe rritja e kapaciteteve të institucioneve përgjegjëse. Hoti e vendosi parimin që në fillim: siguria dhe shëndeti i punëtorëve duhet të udhëheqin çdo vendim dhe veprim institucional. Sipas tij, interesat ekonomike apo afatet nuk mund të vihen mbi jetën e qytetarëve.

"Prandaj ne gjatë këtij viti, prej fillimit të mandatit të parë, sepse ky është mandati i dytë i shkurtër, ne kemi marrë disa hapa konkretë për të forcuar mbrojtjen e sigurisë dhe shëndetit në punë", deklaroi ministri.

Kthesa, sipas tij, erdhi në prill, kur u ndërmorën masa emergjente për të shtuar inspektimet, sidomos në vendet e punës me rrezik të lartë. "Në muajin prill, siç edhe ju kemi njoftuar disa herë, ne kemi ndërmarrë masa emergjente për intensifikimin e inspektimeve me fokus të veçantë në vendet e punës me rrezikshmëri të lartë. Në kuadër të veprimtarisë inspektuese janë ndërmarrë mbi 290 masa për ndalimin e punimeve për shkak të shkeljeve të evidentuara nga 8,608 inspektime të realizuara brenda vetëm shtatë muajve", tha Hoti.

Në këtë periudhë ka ndryshuar edhe mënyra se si punojnë inspektorët. Inspektorati Qendror i Punës, sipas ministrit, ka kaluar tërësisht në inspektim digjital, ndërsa është marrë vendim që kantieret dhe vendet me rrezik të lartë të mbikëqyren edhe me dronë. "Përmes këtyre ndryshimeve ne kemi synuar dhe synojmë një dokumentim më të saktë, një transparencë më të madhe dhe edhe reagim më të shpejtë ndaj shkelësve të saj", u shpreh ai.

Inspektorati pritet të shtohet edhe me njerëz. Hoti tha se po finalizohen procedurat për rekrutimin e 39 inspektorëve të rinj: një pjesë e kandidatëve i kanë kaluar intervistat, të tjerët janë ende në këtë fazë. "Në fushën e marrëdhënieve të punës dhe sigurisë e shëndetit në punë, po i forcojmë kapacitetet e Inspektoratit Qendror të Punës për një mbikëqyrje më të gjerë, më efektive në terren", tha ai.

Ministria po përgatit edhe një fushatë kombëtare vetëdijesimi, e cila u drejtohet si punëdhënësve, ashtu edhe punëtorëve. "Po përgatitim edhe një fushatë kombëtare për vetëdijesimin për sigurinë dhe shëndetin në punë, sepse ne duam që punëdhënësit në radhë të parë t’i përmbushin detyrimet e tyre konform legjislacionit në fuqi, por edhe punëtorët në Republikën e Kosovës të jenë më shumë të informuar për të drejtat e tyre dhe mënyrën e raportimit të abuzimeve", tha Hoti.