ReklamëHapësirë reklame
ReklamëHapësirë reklame
Reklamë
Vetëm muaj pasi Organi Shqyrtues i Prokurimit i dha një vërejtje të fortë për abuzim me procedurat emergjente, Policia e Kosovës ka nënshkruar një kontratë të re prej 800 mijë eurosh për ushqim, pa publikim njoftimi, me kompaninë e biznesmenit dhe anëtarit të LDK-së, Ragip Mustafa.
Ushqimi i policëve të Kosovës vazhdon të blihet pa garë. Policia e Kosovës ka nënshkruar një kontratë me vlerë të parashikuar prej 800 mijë eurosh për furnizim, përgatitje dhe servim ushqimi me kompaninë "Beni Dona Plast" SH.P.K., në pronësi të biznesmenit Ragip Mustafa, i angazhuar politikisht në Lidhjen Demokratike të Kosovës. Njoftimi për nënshkrimin e kontratës është publikuar më 9 shtator 2026, dy ditë pas njoftimit për dhënien e saj.
Kontrata mban titullin "Shërbimet emergjente me Ushqim (Furnizim, Përgatitje dhe Servim) për nevojat e PK-së" dhe është zhvilluar përmes procedurës së negociuar pa publikim të njoftimit për kontratë, pra pa konkurrencë të hapur. Autoriteti kontraktues është Policia e Kosovës, ndërsa procedura figuron e regjistruar me numrin 2026/214/30400-26-7299-2-1-5/B52-0019222. Në dokumentin e vendimit të autoritetit kontraktues, "Beni Dona Plast" paraqitet si operator ekonomik pjesëmarrës, me ofertë prej 52.36 eurosh për njësi.
Nuk është kontrata e parë e këtij lloji brenda vitit. Në shkurt 2026, Policia kishte lidhur me të njëjtën kompani një kontratë tjetër emergjente për furnizim me ushqim, në vlerë prej rreth 650 mijë eurosh. I njëjti dokument i vendimit tregon se Policia kishte anuluar një aktivitet të mëparshëm prokurimi për këtë shërbim, pas së cilit procedura kaloi në formën e kontratës emergjente.
Ai aktivitet i anuluar ishte tenderi i rregullt "Shërbimet me Ushqim (Furnizim, Përgatitje dhe Servim) për nevojat e PK-së", me vlerë të parashikuar 2.7 milionë euro. Ai u anulua më 27 shkurt 2026, me arsyetimin se nuk kishte mbetur asnjë ofertë e përgjegjshme. Vetë "Beni Dona Plast" ishte eliminuar nga ajo garë, me pretendimin e Policisë se kishte ofruar çmime shumë herë më të larta se çmimet reale të tregut. Para Organit Shqyrtues të Prokurimit, Policia argumentoi se një hulumtim i tregut kishte konstatuar se oferta ishte rreth 30 për qind më e lartë se çmimet reale.
Kompania u ankua në OSHP. Në maj, Paneli Shqyrtues vendosi që anulimi i procedurës të mbetej në fuqi, por ia adresoi Policisë një vërejtje të fortë. Paneli vuri në pah një kontradiktë: në procedurat e mëparshme të negociuara pa publikim, Policia kishte pranuar çmime edhe më të larta nga i njëjti operator, ndërsa në procedurën e hapur disa prej këtyre çmimeve i konsideroi të larta krahasuar me tregun. OSHP e cilësoi këtë të papranueshme.
Shqyrtuesit kritikuan gjithashtu prolongimin e procedurës së hapur, duke konstatuar se pikërisht mungesa e kontratave të rregullta po e çonte Policinë drejt inicimit të njëpasnjëshëm të procedurave emergjente. Vërejtja u cilësua si e fundit.
Katër muaj më vonë, më 28 gusht 2026, Policia e hapi sërish tenderin e rregullt për të njëjtat shërbime, i përcaktuar si ritender. Ndërkohë, nevojat u mbuluan përsëri me një kontratë emergjente, atë prej 800 mijë eurosh.
Dosja e tenderit, e konceptuar si kontratë publike kornizë me çmime për njësi, me sasi indikative dhe porosi sipas nevojës, tregon se ushqimi do të përgatitet në kampet Vrellë dhe Belvedere. Në Belvedere pajisjet e kuzhinës janë të Policisë, ndërsa në Vrellë operatori duhet ta sigurojë vetë komplet kuzhinën. Furnizimi duhet të mundësohet në gjithë territorin e Kosovës, përfshirë stacionet policore me qendra të mbajtjes, dhe sipas kërkesës edhe në terren. Lista e ushqimeve përfshin racione me mish viçi, pasul me mish, makarona boloneze, peshk, bukë integrale, ujë, lëngje, fruta, sallata dhe produkte të tjera.
Kontrata emergjente është paraparë të zgjasë gjashtë muaj nga hyrja në fuqi dhe mund të ndërpritet automatikisht sapo të nënshkruhet kontrata përmes procedurës së hapur, pa të drejtë kompensimi për operatorin aktual.
Pas vitesh pritjeje, mosmarrëveshja për qindra miliona euro të paguara nga buxhetet komunale arriti në fazën e parë dëgjimore. Drejtori ekzekutiv i AKK-së, Sazan Ibrahimi, thotë se niveli qendror as që u paraqit.
