Manastiri kryeson me 236 shkelje, qytetarët kërkojnë rrugë të veçanta për trotinetët

Gjashtëqind e gjashtë shkelje dhe 18 trotinetë elektrikë të konfiskuar, të gjitha brenda 30 ditëve. Ky është bilanci i muajit gusht për drejtuesit e mjeteve të lehta elektrike në Maqedoninë e Veriut, sipas të dhënave të Ministrisë së Punëve të Brendshme.

Shkelja më e shpeshtë ka qenë drejtimi gjatë natës pa jelek reflektues, me 162 raste. Pas saj renditen 134 shkelje për mosshfrytëzimin e shtegut për biçikleta ose këmbësorë, 59 për mungesë të helmetës mbrojtëse dhe 45 për transportimin e dy personave në të njëjtin mjet. Në 20 raste, në timon të mjetit janë gjetur persona të mitur.

Harta e shkeljeve nuk është e njëtrajtshme. Manastiri del qartë në krye, me më shumë se dyfishin e kryeqytetit. "Numri më i madh i shkeljeve është konstatuar në territorin e qytetit të Manastirit, me gjithsej 236 raste, pasuar më pas në territorin e Shkupit me 97 raste, në qytetin e Strumicës 82 raste, në Ohër me 57, në Tetovë me 27, në Veles me 18, në Shtip me 13 dhe në territorin e qytetit të Kumanovës janë regjistruar 7 raste. Njësia Mobile për Sigurinë në Trafik ka konstatuar edhe 69 shkelje të tjera", njofton Ministria e Punëve të Brendshme.

Ministria shton se për të gjitha rastet janë ndërmarrë masat përkatëse dhe janë shqiptuar sanksione në përputhje me ligjin.

Në rrugë, durimi i qytetarëve duket se po shterohet. "Është katastrofë, rrezikojnë sigurinë në trafik, por edhe rrezikojnë veten. Duhet të dënohen, nëse ka rregullore ligjore, duhet të dënohen që të vendoset rregull", tha një qytetar.

Një tjetër shkon përtej gjobave dhe kërkon ndërhyrje nga shteti: "Vetëm gjoba më të larta pasi nuk kanë as helmeta e asgjë, ja edhe ky me biçikletë njëjtë. Duhet shteti të bëjë rrugë të veçanta ku të lëvizin, e jo vetëm dënime, por duhet diçka të bëhet".

Shqetësimi për të miturit del edhe te një qytetare: "Mendoj se duhet të kemi rregulla edhe më të rrepta për të gjithë ata që lëvizin pa kontrolle dhe me shpejtësi të lartë e sidomos për ata që janë të mitur".

Një plagë më vete mbeten trotinetët që jepen me qira në Shkup. Qyteti i Shkupit thotë se ende po shqyrton nëse kompanitë që i ofrojnë këto mjete do të detyrohen t'u përshtaten rregullave të reja dhe të sigurojnë pajisje mbrojtëse, si helmeta dhe jelekë reflektues. Për këtë çështje ende nuk ka vendim.