6 milionë euro për rrugët e Shalës: punimet nisin nga Kutlloci, Rashani e Bajgora

Rrugët e Shalës, një nga zonat më të thyera malore të Mitrovicës, janë kthyer në kantier. Kryetari i Komunës së Mitrovicës, Faton Peci, ka bërë të ditur se investimet në infrastrukturën rrugore të kësaj zone po vazhdojnë me intensitet të lartë.

Sipas Pecit, punimet aktualisht janë duke u zhvilluar në fshatrat Kutlloc, Rashan dhe Bajgorë. Në fazën e dytë të projektit pritet të përfshihen edhe Kaçandolli, Maxhera, Batahir, Dedi dhe Ofqarë.

Për përmirësimin e infrastrukturës rrugore në këtë zonë janë paraparë investime në vlerë prej 6 milionë eurosh. Komuna e Mitrovicës thotë se qëllimi është përmirësimi i lidhjeve rrugore dhe krijimi i kushteve më të mira për zhvillimin e zonës.

"Shala e harruar po e merr vëmendjen e merituar", ka theksuar Peci.

Afatet kohore për përfundimin e punimeve nuk janë bërë publike.