589 mijë euro për 80 punonjës pa asnjë ditë pune? Përplasja Rrahmani-Kurti në Kuvend

Gjithsej 589 mijë e 884 euro paga u paguan gjatë vitit 2025 për 80 punonjës që, sipas deputetit të Partisë Demokratike të Kosovës (PDK), Eman Rrahmani, nuk kanë shkuar asnjë ditë në vendin e punës. Rrahmani e ngriti çështjen në Kuvendin e Kosovës, në një pyetje drejtuar kryeministrit Albin Kurti. Kurti iu përgjigj se bëhet fjalë për zyrtarë që nuk e kishin ushtruar kurrë detyrën dhe e cilësoi gjendjen si kosto të gabimeve të së kaluarës.

Rrahmani pretendoi se këta persona kanë qenë pjesë e strukturave paralele serbe që kanë funksionuar në veri të Kosovës dhe ngriti shqetësim se nuk ka informata për identitetin dhe veprimtarinë e tyre. "Pyetja ime është për disa pagesa që i janë bërë 80 punonjësve pa shkuar asnjë ditë në punë. Ata persona janë ish-persona të strukturave paralele që prej kohësh paguhen dhe që ju po vazhdoni t’i paguani, pra janë paguar me vlerë 589 mijë e 884 euro në vitin 2025, pra jeni duke i pagu strukturat paralele që kanë funksionu në veri e që as nuk dihet çka janë, çka bëjnë, në veri apo ku ndodhen?", tha deputeti.

Kryeministri e nisi përgjigjen nga viti 2015. Sipas tij, me vendimin e Qeverisë 06/39 të datës 22 korrik 2015, ish-Ministria e Administratës Publike ishte e obliguar të sistemonte 20 punonjës të komunitetit serb, me qëllim integrimin e tyre në institucionet e Republikës së Kosovës. "Megjithëkëtë, që nga nënshkrimi i akteve të emërimit këta zyrtarë asnjëherë nuk kanë ushtruar detyra zyrtare në kuadër të ministrisë", tha Kurti.

Gjatë vitit 2025, sipas kryeministrit, Ministria e Punëve të Brendshme, si ministri përgjegjëse për administratën publike, i transferoi këta zyrtarë në funksione të tjera brenda saj. Pas vendimeve për transferim, katër prej tyre u larguan nga shërbimi civil si pasojë e masave disiplinore, ndërsa 15 të tjerë kanë paraqitur ankesa kundër transferimit pranë Këshillit të Pavarur Mbikëqyrës për Shërbimin Civil të Kosovës.

Grupi i dytë që përmendi Kurti ndodhet në sektorin e mjedisit. Sipas tij, këtë vit u janë shkëputur kontratat 29 zyrtarëve nga komuniteti serb në Ministrinë e Mjedisit dhe Planifikimit Hapësinor dhe në institucionet vartëse të saj: 20 punonin në ministri, shtatë në Agjencinë për Mbrojtjen e Mjedisit dhe dy në Agjencinë Kadastrale të Kosovës. Kurti tha se ata ishin të njohur si pjesëtarë të të ashtuquajturës Mbrojtje Civile, të cilën Qeveria e tij e shpalli organizatë terroriste në qershor të vitit 2023, dhe se kontratat u ndërprenë për shkak të mungesave të vazhdueshme në vendin e punës.

Gjatë seancës, kryeministri shtoi edhe një shifër tjetër, të cilën tha se ia kishte dhënë ministrja e Ekonomisë, Artane Rizvanolli: në vitin 2024, 18 zyrtarë të tillë janë larguar nga puna.

Kurti mohoi se Qeverisë i mungon vendosmëria dhe kujtoi se ishte pikërisht ajo që shpalli organizata terroriste Mbrojtjen Civile dhe Brigadën e Veriut. "Këto janë kosto të gabimeve të së kaluarës dhe ne nuk mund t’i rregullojmë të gjitha përnjëherë. Kohëzgjatja kushton, i kushton shtetit edhe buxhetit", deklaroi ai.