43.747 leje qëndrimi në BE brenda një viti: Gërxhaliu sheh alarm për Kosovën

Vetëm gjatë vitit 2025, shtete të ndryshme të Bashkimit Evropian u kanë dhënë kosovarëve 43.747 leje qëndrimi. Për ekspertin e ekonomisë Safet Gërxhaliu, kjo shifër nuk duhet lexuar thjesht si një statistikë migrimi, por si një sinjal serioz për të ardhmen e Kosovës.

Gërxhaliu e ka cilësuar alarmant numrin e lejeve që kosovarët kanë marrë në vendet evropiane gjatë viteve të fundit dhe e sheh pasojën në disa rrafshe njëherësh: ekonomik, shoqëror dhe demografik.

"Ekonomikisht, vendi humb fuqi punëtore, profesionistë, konsumatorë dhe potencial për investime e zhvillim. Në aspektin social, largimi i familjeve dhe të rinjve dobëson komunitetet, përshpejton plakjen e popullsisë dhe krijon boshllëqe të reja demografike. Në perspektivë, rreziku është edhe më i madh: një Kosovë me më pak njerëz në moshë pune, më pak lindje, më shumë varësi sociale dhe me kapitalin njerëzor që ndërton ekonomitë e vendeve të tjera", ka shkruar ai.

Sipas Gërxhaliut, nëse emigrimi po kthehet në rrugën kryesore drejt një jete më të mirë, problemi nuk është vetëm se po largohen njerëzit, "por se çfarë të ardhmeje po mbetet pas tyre".