429 raste me virusin e Nilit Perëndimor në Evropë, ECDC kërkon masa urgjente

Sezoni i mushkonjave në Evropë po lë pas shifra që nuk shiheshin më parë. Deri më 13 gusht, në nëntë vende evropiane ishin regjistruar 429 raste të virusit të Nilit Perëndimor të fituara lokalisht, ndërsa gjashtë rajone kanë raportuar raste për herë të parë këtë vit, sipas Qendrës Evropiane për Parandalimin dhe Kontrollin e Sëmundjeve (ECDC).

Paralajmërimi vjen pikërisht në kulmin e sezonit. Transmetimi zakonisht arrin pikun në gusht dhe në fillim të shtatorit, prandaj autoritetet presin që numri i rasteve të rritet edhe më tej.

"Zgjerimi i transmetimit të virusit të Nilit Perëndimor, si dhe përhapja e specieve pushtuese të mushkonjave, tregojnë pse Evropa duhet të forcojë kapacitetin e saj të kontrollit", tha Céline Gossner, eksperte e ECDC-së për sëmundjet vektoriale dhe zoonotike.

Krahas virusit, shqetësim të veçantë ngre mushkonja tigër aziatike (Aedes albopictus), e cila është vendosur tashmë në 16 vende evropiane, dy herë më shumë se 12 vjet më parë. Kjo specie mund të transmetojë sëmundje si dengue dhe chikungunya, të cilat më parë lidheshin kryesisht me zonat tropikale dhe subtropikale.

Një studim i ri i ECDC-së ka evidentuar dallime të mëdha mes vendeve evropiane në mënyrën se si organizohen dhe financohen programet për monitorimin dhe kontrollin e mushkonjave. Sipas raportit, shumë prej tyre mbështeten në financime afatshkurtra dhe nuk kanë plane të qëndrueshme afatgjata, ndërsa përgjegjësitë ndahen shpesh mes autoriteteve kombëtare, rajonale dhe lokale, duke e vështirësuar bashkëpunimin ndërkufitar.

ECDC thekson se kontrolli i mushkonjave duhet të përfshijë monitorimin e popullatave, angazhimin e komuniteteve dhe masa të synuara, duke marrë parasysh edhe ndikimin në mjedis.

Mbi të gjitha rëndon ndryshimi i klimës. Temperaturat më të larta po krijojnë kushte gjithnjë e më të favorshme për mushkonjat dhe po zgjasin sezonet gjatë të cilave mund të transmetohen viruse si Nili Perëndimor, dengue dhe chikungunya.