41 milionë euro kredi për pajisje mjekësore në QKUK dhe katër spitale rajonale

Qendra Klinike Universitare e Kosovës dhe katër spitale rajonale janë përfitueset e një kredie prej 41 milionë eurosh që Qeveria e Kosovës nënshkroi sot me Bankën Evropiane të Investimeve (BEI) dhe Bankën për Zhvillim të Këshillit të Evropës (CEB). Paratë janë të destinuara për pajisje moderne mjekësore dhe për përmirësimin e infrastrukturës shëndetësore.

Shuma ndahet në pjesë të barabarta mes dy bankave. Përveç QKUK-së në Prishtinë, investimi shtrihet në spitalet rajonale të Prizrenit, Pejës, Gjakovës dhe Gjilanit. Për këtë kredi, Qeveria kishte kërkuar më herët dritën jeshile të Presidentes.

Ministri i Financave, Hekuran Murati, e cilësoi dokumentin si marrëveshje kredie, në të cilën Qeveria përfaqësohet nga Ministria e Financave. Sipas tij, marrëveshja hap rrugën për investime në pajisje dhe infrastrukturë, me synimin që të përmirësohen kushtet për pacientët dhe për profesionistët shëndetësorë. "Investimi do të sigurojë pajisje mjekësore moderne dhe do të ndikojë në infrastrukturën përcjellëse në Qendrën Klinike Universitare të Kosovës në Prishtinë, si dhe në spitalet rajonale të Prizrenit, Pejës, Gjakovës dhe atë të Gjilanit", tha Murati.

Ministri i Shëndetësisë, Arben Vitia, e lidhi projektin me Strategjinë Sektoriale të Shëndetësisë 2025-2030, ku modernizimi i infrastrukturës dhe i teknologjisë mjekësore renditet ndër prioritetet. Sipas tij, strategjia parasheh riorganizimin e institucioneve shëndetësore dhe përmirësimin e infrastrukturës fizike, veçanërisht në nivelin sekondar dhe terciar, si dhe furnizimin e tyre me pajisje moderne. "Në objektivat strategjikë të kësaj strategjie, kemi identifikuar riorganizimin e institucioneve shëndetësore dhe modernizimin e infrastrukturës dhe teknologjisë mjekësore si një nga prioritetet e sotme", tha Vitia.

Nga ana e huadhënësve, nënkryetari i Bankës Evropiane të Investimeve, Robert de Groot, u ndal te ndikimi i drejtpërdrejtë te qytetarët. "Kujdesi shëndetësor është një nga mënyrat më të dukshme përmes të cilave investimet publike ofrojnë shërbime për njerëzit", tha ai, duke shtuar se qytetarët duhet të mund të mbështeten te kujdesi mjekësor çdo ditë, 24 orë në ditë, 7 ditë në javë. Sipas De Groot, projekti synon që profesionistët shëndetësorë dhe pacientët në mbarë Kosovën të kenë qasje në pajisje dhe lehtësira moderne. "Kjo do të thotë pajisje mjekësore të avancuara dhe përmirësim i infrastrukturës mbështetëse, duke rezultuar në diagnostikim më të mirë, trajtim më efektiv dhe kujdes të përmirësuar për pacientët", deklaroi ai.

Johannes Böhmer, zëvendësguvernator për Strategjinë e Zhvillimit Social në Bankën për Zhvillim të Këshillit të Evropës, e përmblodi qëllimin e investimit me një frazë të vetme: "Mund të themi se pa shëndet, çdo gjë është asgjë." Ai theksoi se një sistem i fortë shëndetësor është shërbim bazë që institucionet publike duhet t'ua garantojnë qytetarëve. "Pa shëndet, shumë gjëra të tjera bëhen dytësore dhe për këtë arsye, kjo është edhe më e rëndësishme", tha Böhmer.