380 punëtorë të NPB-së në Prishtinë drejt muajit të tretë pa paga, protestë te gjykata

Kreditë bankare, faturat e energjisë elektrike dhe qiratë nuk presin, por pagat e 380 punëtorëve të Ndërmarrjes Publike Banesore (NPB) të Prishtinës po vonohen tashmë afro tre muaj. Llogaria e ndërmarrjes është e bllokuar dhe punëtorët kanë paralajmëruar protestë për të hënën pranë gjykatës.

Valdet Sulejmani, kryetar i Këshillit Organizativ të Punëtorëve të NPB-së, tha në emisionin "Pasdite" të RTK-së se bllokimi i llogarisë vjen si pasojë e një vendimi gjyqësor. Punëtorët, sipas tij, kërkojnë që gjykata të marrë një vendim, në mënyrë që të paktën ta kenë të qartë se si do të vazhdojë situata.

"Punëtorët e Ndërmarrjes Publike Banesore janë në siklet shumë të madh, shkaku që pagat nuk i kemi marrë afro, po hyjmë për muajin e tretë. Dhe është një kosto e madhe. Kemi njerëz që janë në kredi bankare. Faturat e energjisë elektrike nuk na presin neve tre muaj. Nuk na presin qiratë tre muaj", tha Sulejmani.

Muajin e parë, sipas tij, punëtorët e kaluan me huazime. Tani gjendja është rënduar ndjeshëm, sepse askush nuk u ka dhënë një afat se kur do t'i marrin pagat, ndërsa mungesa e tyre po bie drejtpërdrejt mbi familjet.

Tubimi i së hënës ka një kërkesë të vetme: që gjykata ta trajtojë çështjen dhe t'u japë punëtorëve informacion për ecurinë e saj. "Po shohim që asnjë përgjigje, asnjë kurrgjë nuk kemi nga gjykata", deklaroi Sulejmani.

Ai nuk ia hodhi fajin menaxhmentit apo komunës. Sipas Sulejmanit, kryetari i Komunës së Prishtinës, Përparim Rama, ka ndërmarrë veprimet që i ka lejuar ligji dhe ka bërë ankesat përkatëse. Ai vlerësoi edhe kryeshefin ekzekutiv të NPB-së, Artan Berisha, i cili, sipas tij, ka komunikuar me institucionet përkatëse dhe ka ndërmarrë veprimet e nevojshme për zgjidhjen e situatës. Topi, thotë ai, tani është te gjykata, e cila ende nuk ka dhënë një përgjigje konkrete.

Pavarësisht pagave që mungojnë, punëtorët vazhdojnë të dalin në punë. "Asnjë shërbim ende nuk ka ngecje, të gjitha shërbimet jemi duke i kryer për qytetarët e Prishtinës dhe do të mundohemi deri në fund që ne të vazhdojmë me këto shërbime", tha Sulejmani.