372 barna në listën e re esenciale, qytetarët: mungojnë në barnatore, çmimet janë të larta

Një pacient që merr ilaçe prej gati tre dekadash e përshkruan problemin me një fjali: terapia për tension mungoi për gati dy muaj. "Tash ilaçet për tension nuk ka pasur për gati dy muaj, nuk kanë prodhuar dhe kemi pritur me muaj", tha ai. Pikërisht në këtë kontekst vjen përditësimi i listës së barnave esenciale, i pari pas më shumë se një dekade.

Lista e re përmban gjithsej 372 barna. Prej tyre, 193 janë të reja, ndërsa 12 barna të listës së mëparshme janë hequr. Të gjitha janë sistematizuar në 28 fusha terapeutike dhe janë përfshirë edhe terapi të reja.

Nga Ministria e Shëndetësisë thonë se bëhet fjalë për një qasje të re në përcaktimin e barnave esenciale. "Lista e re përmban gjithsej 372 barna, prej të cilave 193 janë të reja. Barnat janë sistematizuar në 28 fusha terapeutike, ndërsa për herë të parë janë përfshirë edhe barna për kontracepsion dhe terapi zëvendësuese me nikotinë", theksojnë nga ministria, duke shtuar se lista është përgatitur mbi bazën e dëshmive të reja shkencore dhe të nevojave bashkëkohore shëndetësore.

Me ndryshimet e reja ligjore, lista do të përditësohet çdo dy vjet. Megjithatë, prania e një bari në listën esenciale nuk do të thotë automatikisht se ai mbulohet nga sigurimi: barnat që u paguhen të siguruarve përcaktohen nga Lista Pozitive, e administruar nga Fondi Shëndetësor. Sipas Fondit, vetëm gjatë vitit 2025 janë realizuar 27,3 milionë receta për barna, ndërsa këtë vit janë shtuar edhe brende të reja në barnatore.

Te qytetarët, reagimi është i përzier. Disa e mirëpresin rifreskimin e listave. "Edhe ashtu duhet të vazhdojë herë pas here lista të ndryshojë dhe të ketë ilaçe të reja, medikamente të reja. Çmimet janë normale, mesatare... Kryesisht janë prej Fondit Shëndetësor edhe atë ilaçet më të rëndësishme, tani lista është bërë, është azhurnuar", tha njëri prej tyre.

Të tjerë flasin për kosto që rëndon çdo muaj. "Unë ato ilaçe i marr gati për 30 vite, për ato harxhoj rregullisht, 1 mijë, 2 mijë denarë në muaj, kryesisht i kam me recetë, vetëm dy ilaçe i marr privat. Po edhe këto të shtypjes që i marr i kanë shtrenjtuar çmimet", u shpreh një qytetar.

Për pacientin, pra, nuk mjafton që terapia të jetë në listë: ajo duhet të gjendet në barnatore dhe të mbulohet nga sigurimi shëndetësor. Sa do të ndryshojnë çmimet dhe disponueshmëria në praktikë, mbetet pyetja pa përgjigje e këtij përditësimi.