35% e të rinjve në Kosovë as punojnë, as studiojnë: 90 mijë mbeten jashtë çdo sistemi

Nëntëdhjetë mijë të rinj në Kosovë nuk janë as në punë, as në bankat e shkollës, as në ndonjë program trajnimi. Sipas të dhënave të Agjencisë së Statistikave të Kosovës, kjo përbën 35% të të rinjve të moshës 15-24 vjeç.

Një sociolog e cilësoi këtë shifër jashtëzakonisht të lartë dhe paralajmëroi se dëmi shkon përtej xhepit të të rinjve: "Nuk është thjesht një pagë mangu te ata, por edhe potenciali që ata nuk mund të krijojnë rrjetin social, nuk mund të inkuadrohen në shoqëri dhe nuk mund të kenë një pavarësi ekonomike".

Në një debat në Klan Kosova, një tjetër i ftuar ngriti pyetjen nëse janë krijuar kushte të mjaftueshme që të rinjtë të jenë pjesë e infrastrukturave dhe aktiviteteve të ndryshme rinore. Megjithatë, ai e ndau fajin edhe me vetë brezin e ri: "Në të njëjtën kohë, ata nuk janë duke e marrë përgjegjësinë që u takon për të qenë pjesë e shoqërisë".

Një gazetare e lidhi problemin drejtpërdrejt me arsimin profesional, ku sipas saj Kosova ka çaluar shumë. Ajo vuri në dukje edhe paragjykimin ndaj zanateve dhe largimin drejt Evropës: "Nuk i kemi futur sa duhet në treg. Nuk munden krejt me pasë diplomë. Nuk është veç diploma ajo që ta siguron arsimin. Ne e dimë që Evropa është duke na i marrë zanatet, dhe janë mosha më të mesme. Por të rinjtë e shohin si kompleks me qenë automekanik, saldues, elektricist. Domethënë, ata e shohin të ardhmen jashtë, por orientimi në karrierë duhet të nisë qysh në moshë të re".

Më e ashpër ishte një gazetare tjetër, e cila në emisionin "Ora Shtatë" deklaroi se politika e Kosovës ka dështuar. Sipas saj, numri i të rinjve jashtë punës dhe shkollimit është rritur, jo zvogëluar: "Sot të rinjtë po i vuajnë pasojat e politikës, sepse po shihet që numri është rritë dhe nuk ka rënë. Ne e kemi pa që në periudhën e fundit në Kosovë, ka rënë një depresion kolektiv, pasi shteti është marrë me gjithçka tjetër pos arsimit dhe të rinjve tanë".