Bilanc i zi në Francë: mbi 300 mbytje gjatë valës së të nxehtit

Nga 19 qershori, Franca ka regjistruar 301 raste mbytjeje. Autoritetet franceze e lidhin këtë bilanc me valën e të nxehtit që ka pushtuar vendin, ndërsa numri i vdekjeve nga mbytja është rritur me 14 për qind krahasuar me vitin 2025.

Shifrat i bëri të ditura ministrja franceze e Sportit dhe Rinisë, Marina Ferari, në një intervistë për radion France Inter. Sipas saj, njerëzit po marrin rreziqe kur hyjnë në ujë dhe një pjesë e mirë e aksidenteve fatale kanë ndodhur në vende që nuk janë të miratuara për not, si ujëra të hapura dhe kanale.

Ferari tha se hyrja e shpejtë dhe e papritur në ujë të ftohtë gjatë një dite me vapë mund të shkaktojë shok, ndërsa në disa raste "njerëzit gjithashtu mund të mbivlerësojnë fatalisht aftësitë e tyre fizike".

Ministrja konfirmoi po ashtu se një numër i madh mbytjesh, veçanërisht te personat e moshuar, kanë ndodhur në pishina private. Ajo tha se qeveria po punon me autoritetet rajonale për të përmirësuar vendet e notit dhe për t'i bërë ato më të sigurta.

Valët e të nxehtit kanë goditur Francën, Spanjën dhe Italinë, duke shkaktuar zjarre masive pyjore dhe shkatërrimin e dhjetëra mijëra hektarëve tokë.