275 mijë euro për shtëpitë e komuniteteve joshumicë në Mitrovicë të Veriut dhe Zveçan

Qeveria e Kosovës ka vendosur të ndajë 275 mijë euro për renovimin e shtëpive të pjesëtarëve të komuniteteve joshumicë në komunat e Mitrovicës së Veriut dhe Zveçanit.

Vendimi vjen pas kërkesave që këto familje i kanë drejtuar Ministrisë së Administrimit të Pushtetit Lokal. Ministri i këtij resori, Elbert Krasniqi, tha se institucioni i tij ka kryer verifikime në terren dhe ka konstatuar se disa shtëpi dhe njësi banimi kanë nevojë për rinovim.

"Ministria e Administrimit të Pushtetit Lokal ka pranuar një numër kërkesash nga pjesëtarët e komuniteteve joshumicë në komunat e Mitrovicës së Veriut dhe Zveçanit për mbështetje financiare për renovimin e shtëpive dhe njësive të banimit. Bazuar në verifikimet e realizuara në terren është konstatuar se përballen me kushte të papërshtatshme të banimit dhe kanë nevojë për mbështetje financiare për renovimin dhe njësive të banimit me qëllim të sigurimit të kushteve të përshtatshme dhe të qëndrueshme të banimit", deklaroi Krasniqi.

Kryeministri Albin Kurti e paraqiti masën si pjesë të angazhimit të qeverisë për barazi ndërmjet të gjitha komuniteteve dhe për përmirësimin e kushteve të jetës së qytetarëve. Sa shtëpi do të përfitojnë nga fondi nuk është bërë ende e ditur.