250 euro për një procesverbal të pastër: kërkohet paraburgim për inspektoren e AUV-së

Për 250 euro, një inspektore ushqimi dyshohet se ishte gati të shkruante në procesverbal se një objekt i kishte respektuar të gjitha rregullat. Tani prokuroria në Shkup kërkon që ajo të mbahet në paraburgim.

Prokuroria Themelore Publike në Shkup ka nxjerrë urdhër për zhvillimin e procedurës hetimore ndaj një 42-vjeçareje, të punësuar si inspektore ushqimi në Agjencinë e Ushqimit dhe Veterinarisë (AUV). Ajo dyshohet për veprën penale "Marrje ryshfeti", sipas nenit 357, paragrafi 1 i Kodit Penal. Sipas prokurorisë, nga 17 deri më 25 shtator ajo ka kërkuar dhe ka pranuar paratë nga drejtuesi i një personi juridik.

Çka duhej të jepte ajo në shkëmbim e përshkruan vetë prokuroria: "Në këmbim, ajo duhej të përgatiste një procesverbal ku do të konstatonte se kishte kryer mbikëqyrje inspektuese dhe se nuk kishte parregullsi në punën e objektit, përkatësisht se ai i kishte respektuar të gjitha procedurat e nevojshme për punë."

Prokurori publik i ka dorëzuar gjyqtarit të procedurës paraprake propozimin për paraburgim, duke përmendur tri arsye: rrezikun e arratisjes, mundësinë që e dyshuara të ndikojë te i dëmtuari dhe në dëshminë e tij, si dhe mundësinë që, duke shfrytëzuar pozitën e saj si inspektore, ta përsërisë veprën. Nuk dihet ende nëse gjykata e ka miratuar kërkesën.