2.476 të vdekur nga Ebola në Kongo: 70.000 doza vaksine nisen drejt epidemisë më të madhe

Republika Demokratike e Kongos po lufton me shpërthimin më të madh të virusit Ebola në historinë e saj — një epidemi që deri tani ka lënë të vdekur 2.476 njerëz nga 5.208 rastet e konfirmuara. Për t'i dalë përballë, vendi do të marrë 70.000 doza të vaksinës Ervebo, njoftoi Organizata Botërore e Shëndetësisë (OBSH) të enjten.

Sipas OBSH-së, dozat janë ndarë nga rezerva globale e vaksinave kundër sëmundjes së Ebolës. Nga to, 20.000 do të përdoren në një provë klinike të fazës së fundit për të kuptuar ndikimin e vaksinës mbi virusin Bundibugyo — pikërisht ai që qëndron pas shpërthimit aktual.

Këtu qëndron edhe sfida më e madhe. Vaksina Ervebo është e licencuar kundër virusit Ebola, njërit nga viruset që shkaktojnë sëmundjen, por jo kundër Bundibugyos. "Nuk dihet nëse Ervebo mund të jetë mbrojtëse ndaj virusit Bundibugyo te njerëzit", theksoi OBSH-ja, duke nënvizuar rëndësinë e provave klinike për të siguruar dëshmi të reja. Deri më sot, asnjë vaksinë dhe asnjë trajtim specifik nuk është miratuar kundër virusit Bundibugyo.

Javën e kaluar, qeveria kongoleze kërkoi lirimin e dozave të Ervebos nga Grupi Ndërkombëtar Koordinues për Furnizimin me Vaksina. 50.000 dozat e mbetura do të përdoren për punonjësit shëndetësorë dhe ata të vijës së parë, në përputhje me rekomandimet e Grupit Strategjik Këshillimor të Ekspertëve për Imunizimin.

Aleanca globale e vaksinave Gavi, me qendër në Gjenevë, njoftoi se do të sigurojë 7 milionë dollarë për të financuar dërgesën në Kongo, si dhe 6 milionë dollarë të tjerë për të mbështetur fushatën e vaksinimit në zonat me rrezik të lartë.

Drejtori i Përgjithshëm i OBSH-së, Tedros Ghebreyesus, tha më herët këtë javë se shpërthimi i Ebolës në lindje të Kongos mbetet një emergjencë globale. Zëdhënësi i sekretarit të përgjithshëm të Kombeve të Bashkuara, Stephane Dujarric, u tha gazetarëve të enjten se agjencitë humanitare paralajmërojnë vazhdimin e përhapjes së epidemisë, teksa autoritetet përpiqen ta menaxhojnë atë.

"Koordinatori ynë i lartë për Ebolën në terren, Julian Harneis, tha se qeveria dhe partnerët tanë po intensifikojnë përgjigjen me pesë prioritete operacionale, duke përfshirë trefishimin e kapacitetit të kujdesit të sigurt, forcimin e angazhimit komunitar, dyfishimin e numrit të ekipeve për varrime të sigurta e dinjitoze, zgjerimin e mbikëqyrjes së sëmundjes dhe rritjen e mbështetjes për më të cenueshmit", tha Dujarric.

Me mbështetjen e OKB-së dhe partnerëve, qeveria kongoleze ka nisur gjithashtu nismën "Lumi Kongo pa Ebola", për të forcuar mbikëqyrjen dhe gatishmërinë ndaj sëmundjes.

Shpërthimi aktual u shpall në mesin e majit, por disa ekspertë dyshojnë se ai mund të ketë nisur që në shkurt.