2.19 milionë euro në gusht: 14.789 persona me ndihmë sociale, sociologët kërkojnë punë

Gjatë muajit gusht, 14.789 persona në Kosovë kanë marrë para nga skema e ndihmës sociale. Për pagesat e tyre janë ndarë mbi 2.1 milionë euro, saktësisht 2.193.282 euro, sipas të dhënave të publikuara nga Agjencia e Statistikave të Kosovës (ASK).

Shifra më e madhe e përfituesve në gusht nuk vjen nga ndihma sociale, por nga skema e shtesave për fëmijë: 374.382 fëmijë përfituan nga kjo kategori brenda vetëm një muaji.

Të dhënat kanë rihapur debatin për efektin e vërtetë të skemave sociale. Sociologët Jeton Brajshori dhe Genc Xërxa, në një intervistë për Radio Dukagjinin, kanë vlerësuar se institucionet duhet të fokusohen më shumë në krijimin e mundësive për punësimin e përfituesve të këtyre skemave.

Brajshori thotë se politikat sociale në Kosovë kanë stagnuar dhe kërkon trajtim të veçantë për kategoritë me nevojë më të madhe për mbështetje. "Problematikë kryesore te ne dhe në shoqërinë tonë është se caktimi i politikave sociale ka ngecje dhe ka stagnim të jashtëzakonshëm. Duhet pasur parasysh, ne e dimë që ka struktura të ndryshme të përfituesve të skemave sociale, në veçanti duhet të jemi më tolerantë dhe ndoshta t’i rrisim këto skema sociale te personat me invaliditet apo te personat të cilët janë, qoftë nëna vetushqyese, qoftë baballarë vetëm me fëmijët", ka thënë ai. Sipas Brajshorit, brenda skemave sociale ka edhe raste të keqpërdorimit.

Xërxa e zhvendos peshën te tregu i punës, duke argumentuar se të ardhurat e qëndrueshme nga puna do t'i largonin gradualisht familjet nga skemat. "Të arrijmë të punësojmë, të krijojmë vende të reja të punës, me një qëllim të na dalin nga skema, por edhe me ato paga, me atë punë, familjet mund të jetojnë dinjitetshëm. Këto janë strategji të mirëfillta të cilat shteti duhet t’i mendojë për ngritjen e mirëqenies sociale, me ngritjen totale të mirëqenies socio-ekonomike dhe jetesën më të mirë të familjeve tona, atëherë dalëngadalë edhe skema sociale do të zbuteshin, do të largoheshin", ka thënë Xërxa.