20 policë të lënduar dhe IPK e njoftuar: bilanci i protestës kundër Ligjit të Specialës

Policia e Kosovës ka njoftuar Inspektoratin Policor të Kosovës (IPK) për dyshime të mundshme se zyrtarët e saj i kanë tejkaluar autorizimet gjatë protestës së mbrëmshme në Prishtinë. Bilanci zyrtar i policisë për atë natë: 20 zyrtarë policorë të lënduar, tre persona të arrestuar, si dhe 12 qytetarë a protestues dhe një gazetar që kërkuan ndihmë mjekësore.

Protesta u mbajt kundër aktgjykimit të Gjykatës Speciale në Hagë ndaj ish-krerëve të UÇK-së dhe ndryshimeve të propozuara në Ligjin për Dhomat e Specializuara.

Sipas policisë, disa protestues hodhën vazhdimisht mjete piroteknike, fishekzjarrë dhe mjete të forta drejt objekteve shtetërore dhe zyrtarëve policorë. Në njoftimin e saj, policia e arsyeton kështu ndërhyrjen: “Policia e Kosovës, me qëllim të vënies së situatës nën kontroll, mundësimit të lirisë së lëvizjes dhe parandalimit të eskalimit të mëtejshëm të situatës, është detyruar të veprojë ndaj personave që kanë shfaqur dhunë, duke përdorur mjetet e ligjshme policore, sprejin, gazin lotsjellës si dhe topin e ujit për shpërndarje të turmës”.

Tre persona u arrestuan për mosrespektim të thirrjeve të vazhdueshme policore për qetësi dhe për shkelje të ligjit. Me vendim të prokurorit, dy prej tyre janë dërguar në mbajtje, ndërsa i treti është liruar në procedurë të rregullt.

Lëndimet e 20 zyrtarëve policorë, sipas policisë, janë të natyrave të ndryshme dhe të gjithë kanë marrë trajtim mjekësor. Trajtim kanë marrë edhe 12 qytetarët a protestuesit dhe gazetari që kërkuan ndihmë. Në menaxhimin e situatës, sipas policisë, ndihmuan ekipet mjekësore, zjarrfikësit dhe institucionet e tjera emergjente.

Njoftimi për IPK-në erdhi pas vlerësimeve pasoperacionale, të cilat policia thotë se i bën pas çdo planifikimi operacional, duke e përshkruar veten si institucion demokratik dhe llogaridhënës. Mbi bazën e të gjeturave për veprimet në terren, ajo ia ka kaluar inspektoratit, si autoritet kompetent, vlerësimin e dyshimeve për tejkalim të autorizimeve.

Ndërkohë, sheshi “Skënderbeu” pret sot një protestë të re të paralajmëruar. Policia thotë se ka ndërmarrë masat e nevojshme të sigurisë dhe do të angazhojë njësi policore për ruajtjen e rendit dhe qetësisë publike. Varësisht nga zhvillimet në terren, mund të ketë kufizime ose ndërprerje të përkohshme të qarkullimit në rrugët përreth.

Policia u ka bërë thirrje pjesëmarrësve që protesta e sotme të zhvillohet në mënyrë të qetë dhe demokratike, duke respektuar ligjet dhe udhëzimet e zyrtarëve policorë, të cilët do të jenë sërish në terren për të garantuar sigurinë publike dhe lirinë e lëvizjes.