16 vjet burg për ish-policin që qëlloi me armë zyrtare në një dasmë në Bibaj

Një ish-polic është dënuar me 16 vjet burgim për vrasjen e një burri 89-vjeçar gjatë një ceremonie martesore në fshatin Bibaj të Ferizajt, ngjarje e ndodhur në gusht të vitit 2024.

Aktgjykimin e shpalli Gjykata Themelore në Ferizaj, Departamenti për Krime të Rënda, e cila e njoftoi vendimin më 30 shtator 2026. Trupi gjykues, i kryesuar nga gjyqtari Ilir Bytyqi, pas shqyrtimit gjyqësor dhe administrimit të provave personale e materiale, e shpalli të pandehurin F.R. fajtor për vrasje të rëndë, sipas nenit 173, paragrafi 1, nënparagrafi 1.8 i Kodit Penal të Republikës së Kosovës.

Në dënimin prej 16 vitesh do t'i llogaritet koha e kaluar në paraburgim, ku ndodhet që nga 16 gushti 2024, dita e ngjarjes. Dënimi do të ekzekutohet vetëm pasi aktgjykimi të marrë formë të prerë.

Sipas aktakuzës, më 16 gusht 2024, rreth orës 19:21, në parkingun e oborrit të restorantit "F. Palace" në Bibaj, ish-polici shtiu me breshëri plumbash me armën zyrtare automatike të policisë drejt viktimës S.S., 89 vjeç, i cili mbeti i vdekur në vend. Akuza e përshkruan veprën si të kryer me dashje dhe me paramendim, me qëllim hakmarrjeje për motive të pretenduara familjare, të cilat sipas saj ishin të pabazuara dhe të pakonfirmuara juridikisht. Të shtënat ndodhën në prani të dhjetëra personave, mes tyre edhe të mitur.

Me aktvendim të veçantë, gjykata i vazhdoi të dënuarit masën e paraburgimit deri në plotfuqishmërinë e aktgjykimit, por jo më gjatë se kohëzgjatja e dënimit të shqiptuar. Baza ligjore është neni 366, paragrafi 6, lidhur me paragrafin 1, nënparagrafi 1.1 i Kodit të Procedurës Penale.

Për kërkesën pasurore juridike, të dëmtuarit u udhëzuan në kontest civil.

Vendimi është i shkallës së parë. Palët kanë 30 ditë kohë nga marrja e aktgjykimit me shkrim për të paraqitur ankesë në Gjykatën e Apelit në Prishtinë, përmes Gjykatës Themelore në Ferizaj.