Qeveria ndan 15 milionë euro për faturat e energjisë së familjeve në nevojë

Familjet më të cenueshme në Kosovë do të marrin ndihmë direkte në faturat e energjisë elektrike. Qeveria ka ndarë 15 milionë euro për këtë qëllim, njoftoi ministri për Punë, Familje dhe Vlerat e Luftës Çlirimtare, Andin Hoti.

Paratë janë pjesë e Programit për Mbrojtjen e Konsumatorëve të Cenueshëm të Energjisë Elektrike 2026-2027, të miratuar në mbledhjen e pestë të Qeverisë. Sipas Hotit, përmes këtij programi do të subvencionohen faturat e familjeve që kanë më së shumti nevojë për mbështetje. "15 milionë euro mbështetje. Drejtpërdrejt në faturat e familjeve", deklaroi ministri.

Kush saktësisht do të përfitojë, ende nuk dihet. Hoti paralajmëroi se akti që do ta zbardhë këtë është gati për nënshkrim: "Ditëve në vazhdim do ta nënshkruaj edhe vendimin me të cilin do të përcaktohen kushtet dhe kriteret për përfitim, në mënyrë që të hapet thirrja për aplikim."

Masa nuk vjen vetëm si përgjigje ndaj çmimeve. Ministri e lidhi atë me angazhimet që Kosova ka marrë në rrugën drejt Bashkimit Evropian. "Republika e Kosovës ka marrë obligime edhe në kuadër të procesit të integrimit evropian dhe zbatimit të Planit të Rritjes për Ballkanin Perëndimor, i cili parasheh zhvillimin e mekanizmave të qëndrueshëm për identifikimin dhe mbështetjen e konsumatorëve të cenueshëm, përfshirë krijimin dhe mirëmbajtjen e një regjistri funksional të konsumatorëve të cenueshëm", tha Hoti.