15 ditë i bllokuar në një shpellë nënujore: si mbijetoi peshkatari meksikan në errësirë

Ishte një dalje e zakonshme për peshkim ajo që ia ktheu jetën Erasto Crisanto Valdezit, një peshkatari 31-vjeçar nga Meksika, në një provë 15-ditëshe mbijetese në errësirën e një shpelle nënujore.

Sipas rrëfimit të ngjarjes, Valdezi kishte dalë për peshkim me babanë e tij më 23 korrik. Teksa ndiqte një peshk me fuzhnjë, ai u fut gjithnjë e më thellë në një sistem shpellash dhe humbi orientimin, në një thellësi prej më shumë se 100 metrash nën sipërfaqe.

Fati i tij ndryshoi kur arriti të gjente një hapësirë me ajër ku mund të merrte frymë. Aty pinte ujë nga një lumë nëntokësor dhe, pa asnjë kafshatë ushqim, kaloi 15 ditë duke fjetur dhe duke u lutur për të mbijetuar.

Ndërkohë, ekipet e shpëtimit nisën kërkimet. Pas gjashtë ditësh, ata gjetën fuzhnjën e tij në rreth 65 metra thellësi — një shenjë se ishte diku aty poshtë — por nuk arritën ta lokalizonin peshkatarin. Për ta gjetur, kërkimet u intensifikuan me pjesëmarrjen e një ekipi ndërkombëtar nga Meksika, Gjermania, Shtetet e Bashkuara dhe Republika Dominikane.

Zgjidhja erdhi pas 15 ditësh, kur një zhytës amerikan arriti ta gjente Valdezin në një hapësirë të thatë brenda shpellës. I rraskapitur dhe i dehidratuar, 31-vjeçari u nxor në sipërfaqe nga zhytësit dhe u dërgua menjëherë në spital për trajtim mjekësor.

Mbijetesa e tij për 15 ditë në errësirë, pa ushqim dhe në thellësi kaq të madhe, është cilësuar si një rast i jashtëzakonshëm.