13 vjet pa drejtësi: EULEX-i rikthen apelin për vrasjen e doganierit lituanez te Zveçani

Një vrasje e kryer në rrethinën e Zveçanit më 19 shtator 2013 vazhdon të mbetet pa përgjigje. Doganieri lituanez i Misionit të Bashkimit Evropian për Sundimin e Ligjit (EULEX), Audrius Senavicius, u vra teksa ishte në detyrë në pjesën veriore të Kosovës të banuar me shumicë serbe. Trembëdhjetë vjet më vonë, autori apo autorët nuk janë identifikuar.

Me rastin e 13-vjetorit, Bashkimi Evropian ka kërkuar sërish drejtësi për rastin. Shefi i EULEX-it, Antero Lopes, mori pjesë të shtunën në ceremoninë përkujtimore dhe përsëriti thirrjen publike drejtuar kujtdo që mund të ketë dijeni për ngjarjen.

"E ripërsëris edhe një herë apelin e EULEX-it: nëse dikush ka informacione që mund të ndihmojnë hetimet e Policisë së Kosovës, ju lutem të dilni dhe t'i ndani ato. Le ta kujtojmë Senaviciusin dhe sakrificën e tij", shkroi Lopes.

Në postimin e tij, Lopes u shpreh: "Të shtunën pata privilegjin të përkujtoj 13-vjetorin e vdekjes tragjike të zyrtarit doganor lituanez të EULEX-it, Audrius Šenavičius, i cili u vra në krye të detyrës më 19 shtator 2013."

Hetimet për rastin zhvillohen nga Policia e Kosovës. EULEX-i kishte vendosur një shpërblim prej 82 mijë eurosh për çdo informacion që mund të ndihmojë në identifikimin, arrestimin dhe ndëshkimin e autorit apo autorëve të vrasjes, një shumë që pas trembëdhjetë vjetësh ende nuk ka dhënë rezultat.