13-vjeçari i zhdukur gjendet duke shitur qirinj në malin e Tomorrit, arrestohet një 38-vjeçar

Kërkimet për një 13-vjeçar të larguar nga banesa përfunduan në shpatet e malit të Tomorrit, ku shërbimet e Policisë e gjetën fëmijën duke shitur qirinj. Pak orë më vonë, në pranga ra një 38-vjeçar, i identifikuar me inicialet Y. D., i dyshuar se e kishte shfrytëzuar të miturin.

Sipas Policisë së Shtetit, Drejtoria Vendore e Policisë së Beratit nisi menjëherë verifikimet dhe veprimet për gjetjen e fëmijës pasi informacioni për largimin e tij u bë publik nga portali "JOQ Albania". Duke u bazuar te të dhënat se i mituri ndodhej në zonën e Tomorrit, policia organizoi kërkimet atje dhe arriti ta lokalizojë atë.

Në vijim të veprimeve hetimore dhe procedurale të kryera në bashkëpunim me Prokurorinë, 38-vjeçari u arrestua në flagrancë për veprën penale "Trafikimi i të miturve". Sipas policisë, ai dyshohet se e kishte marrë të miturin nga Tirana dhe e kishte transportuar drejt malit të Tomorrit më 17 gusht 2026, ku dyshohet se e ka shfrytëzuar për shitjen e qirinjve. Si provë materiale u sekuestruan një telefon celular dhe një shumë parash, që dyshohet se është përfituar nga shfrytëzimi i fëmijës.

I mituri u gjet në gjendje të mirë shëndetësore dhe, pas kryerjes së veprimeve procedurale, iu dorëzua familjarëve. Materialet procedurale i janë referuar Prokurorisë për veprime të mëtejshme. Policia e Beratit falënderoi median që publikoi informacionin për rastin, si dhe qytetarët që ndihmuan me të dhënat e tyre në gjetjen e fëmijës. I dyshuari përfiton nga prezumimi i pafajësisë derisa faji të vërtetohet nga gjykata.

Rasti është pjesë e bilancit 24-orësh të Policisë së Shtetit, e cila raporton se në të gjithë vendin janë finalizuar pesë operacione, për parandalimin e përshkallëzimit të një konflikti, goditjen e veprimtarive në fushën e narkotikëve dhe zbardhjen e disa rasteve të mashtrimit e të vjedhjes. Janë kapur gjithashtu tre shtetas të shpallur në kërkim për vepra të ndryshme penale.

Në fushën e narkotikëve janë goditur gjashtë raste, me dy të arrestuar dhe katër të proceduar në gjendje të lirë, ndërsa janë sekuestruar sasi dhe doza lëndësh të dyshuara narkotike, kokainë dhe kanabis, si dhe janë asgjësuar bimë narkotike të kultivuara. Në fushën e krimeve ndaj personit janë evidentuar gjashtë raste, me dy të arrestuar dhe gjashtë të proceduar në gjendje të lirë. Mes tyre është një 34-vjeçar, i cili dyshohet se vuan nga probleme të shëndetit mendor dhe dyshohet se ka goditur me mjet prerës kushërirën e tij, e cila ndodhet në spital, jashtë rrezikut për jetën.

Katër raste janë regjistruar për krime kundër pronës, me një të arrestuar dhe një të proceduar, ndërsa për katër të tjera po punohet për identifikimin e autorëve. Në fushën e krimeve kundër mjedisit janë evidentuar pesë raste, me një të arrestuar, tre të proceduar në gjendje të lirë dhe dy të shpallur në kërkim. Pas hetimeve për tri vatra zjarri të konstatuara në fshatin Krastë të Krujës, u proceduan në gjendje të lirë dy shtetas: njëri, me detyrë rojë mjedisore, për "Shpërdorimi i detyrës", dhe tjetri për "Moskallëzimi i krimit".