12 të mitur nën hetim në Gjermani për dhunën ndaj një 14-vjeçari, mes tyre shqiptarë

Një 14-vjeçar përfundoi në spital me lëndime të rënda në qytetin gjerman Neubrandenburg, në landin Mecklenburg-Vorpommern. Sipas policisë, ndaj tij dyshohet se janë përdorur grushte, shqelma dhe sende të ndryshme, ndërsa i janë shkaktuar edhe djegie. Hetuesit kanë identifikuar 12 fëmijë dhe adoleshentë të dyshuar për përfshirje në sulm.

Sipas gazetës gjermane BILD, djali dyshohet se është rrahur dhe keqtrajtuar për disa orë nga një grup moshash nga 9 deri në 15 vjeç. Ngjarja është filmuar nga disa kënde dhe pamjet kanë qarkulluar për njëfarë kohe në rrjetet sociale.

Në mesin e të dyshuarve, sipas autoriteteve gjermane, ka gjermanë, shqiptarë, tunizianë dhe persona me prejardhje gjermano-turke. Jo të gjithë kanë pasur të njëjtin rol: disa dyshohet se kanë marrë pjesë drejtpërdrejt në dhunë, ndërsa të tjerët kanë filmuar.

Pikërisht telefonat e tyre janë bërë prova kyçe. Hetuesit i kanë sekuestruar aparatet dhe në to kanë gjetur materiale filmike, të cilat, sipas policisë, kanë ndihmuar në zbardhjen e rastit dhe në përcaktimin e rolit të secilit.

Pesha e plagëve u kuptua vetëm më vonë. Fillimisht policia kishte njoftuar se i mituri kishte pësuar lëndime të lehta, por pas vlerësimit mjekësor ai u klasifikua si i lënduar rëndë dhe u dërgua për trajtim në spital.

Policia po heton për vepra të dyshuara penale, përfshirë lëndimin e rrezikshëm trupor, detyrimin dhe fyerjen. Për personat që dyshohet se kanë pasur rolin kryesor në sulm, autoritetet nuk kanë dhënë hollësi të tjera, duke përmendur arsye hetimore.

Një pjesë e të dyshuarve nuk do të përballen me drejtësinë penale. Sipas ligjit gjerman, fëmijët nën 14 vjeç nuk kanë përgjegjësi penale, prandaj për ta pasojat do të trajtohen në bashkëpunim me shërbimet për mbrojtjen e të miturve. Rasti mbetet nën hetim nga policia kriminale e Neubrandenburgut.